ਵੈਨਕੂਵਰ, 25 ਅਗਸਤ (ਰਵੀ ਕਾਂਤ):ਸਰੀ ਦੇ ਪੰਜਾਬੀ ਭਾਈਚਾਰੇ ਨਾਲ ਸਬੰਧਿਤ ਬਜ਼ੁਰਗਾਂ ਦੇ ਇੱਕ ਵਿਸ਼ੇਸ਼ ਗਰੁੱਪ ਵੱਲੋਂ ਸਰੀ ਦੇ ਸਾਬਕਾ ਮੇਅਰ ਅਤੇ ਆਉਂਦੀਆਂ ਮੇਅਰ ਚੋਣਾਂ ਦੀ ਦੌੜ ਵਿੱਚ ਸ਼ਾਮਿਲ ਪ੍ਰਮੁੱਖ ਉਮੀਦਵਾਰ ਡੱਗ ਮੈਕੈਲਮ (Doug McCallum) ਅਤੇ ਪੰਜਾਬੀ ਮੂਲ ਦੇ ਮੌਜੂਦਾ ਕੌਂਸਲਰ ਮਨਦੀਪ ਨਾਗਰਾ ਦੇ ਧਿਆਨ ਵਿੱਚ ਕੈਂਡਲੀ ਪਾਰਕ (Candela Park / Cendly Park) ਨਾਲ ਸਬੰਧਿਤ ਬੁਨਿਆਦੀ ਸਹੂਲਤਾਂ ਦੀ ਘਾਟ ਕਾਰਨ ਆ ਰਹੀਆਂ ਗੰਭੀਰ ਮੁਸ਼ਕਲਾਂ ਨੂੰ ਲਿਆਂਦਾ ਗਿਆ।
ਇਸ ਅਹਿਮ ਮੀਟਿੰਗ ਸਬੰਧੀ ਵਧੇਰੇ ਜਾਣਕਾਰੀ ਸਾਂਝੀ ਕਰਦਿਆਂ ਸੀਨੀਅਰ ਆਗੂ ਦਵਿੰਦਰ ਸਿੰਘ ਰਸੂਲਪੁਰ ਨੇ ਦੱਸਿਆ ਕਿ ਪਾਰਕ ਵਿੱਚ ਰੋਜ਼ਾਨਾ ਆਉਣ ਵਾਲੇ ਬਜ਼ੁਰਗਾਂ ਅਤੇ ਸਥਾਨਕ ਨਿਵਾਸੀਆਂ ਨੂੰ ਕਈ ਲੋੜੀਂਦੀਆਂ ਸਹੂਲਤਾਂ ਦੀ ਅਣਹੋਂਦ ਨਾਲ ਜੂਝਣਾ ਪੈ ਰਿਹਾ ਹੈ। ਬਜ਼ੁਰਗਾਂ ਦੇ ਗਰੁੱਪ ਨੇ ਪਾਰਕ ਵਿੱਚ ਬੈਠਣ ਲਈ ਬੈਂਚਾਂ ਦੀ ਘਾਟ ਪੂਰੀ ਕਰਨ, ਪੀਣ ਵਾਲੇ ਪਾਣੀ ਦਾ ਢੁਕਵਾਂ ਪ੍ਰਬੰਧ ਕਰਨ, ਧੁੱਪ-ਮੀਂਹ ਤੋਂ ਬਚਾਅ ਲਈ ਨਵੇਂ ਸ਼ੈੱਡ (Sheds) ਬਣਾਉਣ ਅਤੇ ਆਧੁਨਿਕ ਨਵੇਂ ਵਾਸ਼ਰੂਮਾਂ (Washrooms) ਦੀ ਉਸਾਰੀ ਕਰਨ ਸਬੰਧੀ ਕੁਝ ਅਹਿਮ ਮੰਗਾਂ ਮੇਅਰ ਉਮੀਦਵਾਰ ਡੱਗ ਮੈਕੈਲਮ ਅਤੇ ਕੌਂਸਲਰ ਮਨਦੀਪ ਨਾਗਰਾ ਦੇ ਸਨਮੁੱਖ ਰੱਖੀਆਂ।
ਮੇਅਰ ਉਮੀਦਵਾਰ ਡੱਗ ਮੈਕੈਲਮ ਅਤੇ ਮੌਜੂਦਾ ਕੌਂਸਲਰ ਮਨਦੀਪ ਨਾਗਰਾ ਨੇ ਬਜ਼ੁਰਗਾਂ ਦੀਆਂ ਇਨ੍ਹਾਂ ਸਾਰੀਆਂ ਮੰਗਾਂ ਨੂੰ ਬਹੁਤ ਹੀ ਹਮਦਰਦੀ ਅਤੇ ਗੰਭੀਰਤਾ ਨਾਲ ਸੁਣਿਆ। ਉਨ੍ਹਾਂ ਭਾਈਚਾਰੇ ਨੂੰ ਪੱਕਾ ਵਿਸ਼ਵਾਸ ਦਿਵਾਇਆ ਕਿ ਆਉਂਦੀਆਂ ਚੋਣਾਂ ਵਿੱਚ ਜਿੱਤ ਹਾਸਲ ਕਰਨ ਉਪਰੰਤ ਨਗਰ ਨਿਗਮ ਵੱਲੋਂ ਇਨ੍ਹਾਂ ਸਾਰੀਆਂ ਮੰਗਾਂ ਨੂੰ ਪਹਿਲ ਦੇ ਅਧਾਰ ‘ਤੇ ਹੱਲ ਕਰਵਾਇਆ ਜਾਵੇਗਾ ਅਤੇ ਪਾਰਕ ਨੂੰ ਆਧੁਨਿਕ ਸਹੂਲਤਾਂ ਨਾਲ ਲੈਸ ਕੀਤਾ ਜਾਵੇਗਾ।
ਇਸ ਮੌਕੇ ‘ਤੇ ਬਜ਼ੁਰਗਾਂ ਦੇ ਗਰੁੱਪ ਅਤੇ ਪਤਵੰਤਿਆਂ ਵਿੱਚ ਸੁਰਿੰਦਰ ਭੱਲਾ, ਗੁਰਬਚਨ ਸਿੰਘ ਬਰਾੜ, ਰਜਿੰਦਰ ਗਿੱਲ, ਸੁਖਮੰਦਰ ਬਰਾੜ, ਮੋਹਨ ਸਿੰਘ ਮੋਹਾਲੀ, ਕੇਵਲ ਸਿੰਘ ਖੋਸਾ, ਚਰਨ ਸਿੰਘ, ਕਰਨੈਲ ਸਿੰਘ, ਲਛਮਣ ਸਿੰਘ ਲਹਿਰੀ, ਗੁਰਮੀਤ ਸਿੰਘ ਕਾਹਲੋ, ਅਮਰਜੀਤ ਸਿੰਘ ਸੰਘੇੜਾ, ਜਰਨੈਲ ਕੌਰ, ਪ੍ਰਦੀਪ ਕੌਰ ਰਸੂਲਪੁਰ, ਤੇਜਪਾਲ ਕੌਰ, ਬਲਜੀਤ ਕੌਰ ਅਤੇ ਹਰਪ੍ਰੀਤ ਕੌਰ ਸਮੇਤ ਭਾਰੀ ਗਿਣਤੀ ਵਿੱਚ ਸਥਾਨਕ ਨਿਵਾਸੀ ਹਾਜ਼ਰ ਸਨ।
